Merry Chritsmas

From my heart.: have peace , love ,health... God bless all of you

عيد سعيد على كل المصريين

عيد سعيد مبارك.. كل عام و جميع المصريين بخير

مصر .. الجزائر.. السودان.. رايح جاى

على الرغم أنه ليس هناك حديث بين الناس فى مصر سوي التصرفات الهمجية للجزائريين فى السودان و تعديهم على المصريين و المصريات هناك إلا أن الأيام لم تكد تمضى كثيرا حتى كشفت النقاب عن دور بعض الاعلاميين والصحفيين و من يقولون عنهم انهم مفكرون و الذين فقدوا دورهم الحقيقي وانتماءهم لهذا الوطن بمحاولة الدفاع عن الموقف الجزائري في جريمة كشفت مدي الحقد والغل الذي يحمله الجزائريون لمصر‏..‏.‏أليس لنا أن نسأل: أين نخوة وشجاعة هؤلاء الذين يدافعون عن الجزائريين بعد كل ما حدث للجمهور المصري ؟‏! مخالفين لإتجاه الرأي العام المصرى.

و نتيجة لما حدث فى السودان فإننى أضم صوتي لكل المصريين الذين لايرغبون في وجود السفير الجزائري في مصرفيا ترى سيستجيب المسئولون لذلك مقدمين هدية العيد للرأى العام.. لا أظن

بكل فخر .. كاكا يهزم مصر

بكل فخر .. كاكا يهزم مصر

البرازيل تهزم مصر بالضربة القاضية غير الفنية.. بعد ان تفوقت مصر بالنقاط الفنية

قبل المباراة.. كنت أخشى الهزيمة الثقيلة من قبيلة السامبا الأشداء..و لكن أثناء الشوط الأول فرحت بأننا قد أحرزنا هدفاً فى البرازيل.. و كنت انتويت كتابة تعليق..هيه لقد أحرزنا هدفا فى مرمى البرازيل يا رجالة.. لكن حسن شحاتة و تلامذته ( و أفضلهم سيد معوض.. أحمد فتحى.. محمد شوقى.. محمد زيدان( رغم غضبى منه السابق لتفضيله اللعب للدانمارك على اللعب لمصر.. محمد أبوتريكة..سعيد أوكا.. هانى سعيد( الذى إستفاق أخيراً خلال المباراة بعد عام كامل فى العك الزملكاوى).. المحمدى رغم طرده) و أسوأهم عصام الحضرى( و لا أدرى لماذا الإصرار عليه).. فعلوها و جعلونا نشعر بالفخر.. و لم أصدق نفسى بإنفعالى بالهدفين الملعوبين لمحمد شوقى و زيدان الثالث فى دقيقة و احدة و كأن الهف الثالث جاء بتأثير الصدمة النفسية لفريق البرازيل.. و كأنهم لم يصدقوا أن الفراعنة يقدرون على فعل ذلك.. صحيح أن البرازيل إستهانت بفريقنا لكننا كنا فوق العادة فى هذا اليوم.. و لم تكن البرازيل تستحق أن تفوز بالقاضية غير الفنية على فريق مجتهد مثل الفراعنة.

إنفلونزا الخنازير

مهزلة تعامل حكومتنا الرشيدة و مجلسنا الموقر سيد قراره فى مسألة إنفلونزا الخنازير موضة الأوبئة الكونية؛ شعار العولمة المرضية؛ مش عارف مين العبقرى اللى كرر إن الحل هو الدبح؛ مع إن مفيش بلد تانى فى العالم كله؛ بما فيها المكسيك صاحبة اول ظهور للمرض؛ قرر نفس القرار المتفرد للفراعنة؛ اللى مش ها يمنع إنتشار المرض لو دخل مصر؛ حيث ان المرض ينتقل بين البشر لو فيه إصابة؛ و كمان مفيش حالة إصابة واحدة لخنزير فى مصر؛ و بدل ما توفر الحكومة أماكن جديدة لحظائر الخنازير بعيد عن العمران؛ فكرت فى أسهل حاجة وهو الدبح؛ و لكن العبقرى صاحب الفكرة؛ كان يقصد القتل الأول ولما لقيوا إن ده معناه تعويضات لأصحاب الخنازير؛ و تجيبلهم منين الحكومة؛ اللى أصلا محتاسة فى تدبير العلاوة الإجتماعية السنوية؛ فكر عبقرينو إن خلاص ندبح الخنازير بالعافية؛ و أصحابها يلبسوا الموضوع؛ ما إحنا ها نسيبلهم لحم الخنازير؛ ياكلوه بقى و لا يبيعوه هم أحرار؛ و مش مهم أرزاق الناس الغلابة اللى بتشتغل فى تربية الخنازير؛ سواء مسلمين او مسيحيين؛ المهم إن مفيش مانع إن المحظورة تركب الموجة؛ و تدخل الموضوع فى شكل دينى؛ مع إن السبب الحقيقى فى القرار مش دينى ولا حاجة.. دا سببه الحقيقى عجز الحكومة عن تدبير الحلول الصحيحة؛ و بقينا مهزأة فى العالم كله؛ لدرجة إن بريجيت باردو إتريقت علينا و قالت غننا متخلفين حسب الـ BBC
و كمان منظمة الأغذية والزراعة إستنكرت الموضوع؛ منهم لله العجزة اللى وكسنا برة و جوة. لا و قال ناقصة إن الأهلى يوكسنا هو كمان و يتغلب أفريقيا و كأن مش مكفيه خيبة الدورى

شدى حيلك يا بلد... هيلللا هوب

غنى يا محمد .. يللا يا مش عارف مين .. كان الأخ محمد نوح ينادى على ولاده فى واحدة من اغانيه عشان يحمسهم للغنا.. ده كان رأيى بصراحة فى الأخ حسن شحاتة فى طريقته لتدريب و قيادة منتخب مصر.. خصوصا فى بطولة كاس الأمم الأفريقية 2006 فى مصر .. و ما كنتش شايف أى دور ليه غير إنه يجمع أحسن لعيبة فى مصر و يرميهم فى الملعب .. يللا هيلا هوب يا أولاد عايزين نغلب .. و ينادى يللا يا عماد.. يللا يا عمرو.. هيه يا أبو تريكة.. أيوة يا حضرى.. و يا صابت .. يا إتنين عور.. لكنها صابت معاه جداً فى 2006.

**********

لكن الحقيقة السنة دى فى بطولة كأس الأمم الأفريقية 2008 بغانا.. و خصوصاً فى ماتش الكاميرون ..و لأول مرة أحس بأن ( حسن شحاتة ) كوتش تقيل بجد و إنه ليه بصمة على اللعيبة و مفيش واحد فيهم يقدر يعمل حاجة اللى إتعلمها منه.. و بيعرف يقرا الماتش و امتى يهدى و إمتى يلعب.. و فى باقى ماتشات المجموعة.ز كنت حاسس إنه ليه هدف عايز يوصله و من وجهة نظره بيعمل تكتيك معين.ز و الحمد لله نجح لحد دلوقتى فى تحقيق الهدف المرحلى .. اللى هو وصوله للدور الثانى رغم كل اللى شايفه من إتحاد الكورة..

**********

و بصراحة لازم الواحد يعترف إن الكابتن حسن شحاتة إتطور كتييير فى أداؤه و فى شكله.. و كمان فى إنفعالاته مع الماتش .. ياه دا فى 2006.. كان حاجة تانية خالص.ز ما كنتش تحس إنه فاهم و إن إنفعالاته كلها إنفعالات مراهقين.ز و بطريقة هيللا هوب .. يللا يا محمد بتاعة محمد نوح.. لكن دلوقتى متحكم فى إنفعالاته و زى ما يكون رزين بجد..

**********

المهم بعد إنتهاء مباريات الدور الأول من كأس الأمم الأفريقية الـ 26 بغانا 2008؛ أتوقع الآتى:-

• فوز نيجيريا على غانا فى دور الثمانية؛ رغم إن نيجريا كانت باهتة و صعدت بالعافية أصلاً.
• فوز كوت ديفوار طبعا على غينيا.. و طبعاً لأن الإيفواريين و خصوصاً دروجبا جايين و شكلهم عايزين يفشوا غلهم من البطولة اللى فاتت إللى خسروها فى النهائى امام مصر بضربات الترجيح من نقطة الجزاء و خصوصاً إنهم كانوا حاسين إنهم احسن من مصر و كانوا أكتر إستحقاقاً مننا بالبطولة الماضية.
• فوز مصر على أنجولا.. و ربنا يبعد فلافيو عن الحضرى .. قولوا يا رب.
• فوز الكاميرون الكاسح على تونس. و الكاسح أولاً لأن تونس باهتة .. و لأن الكاميرون لعب الدور الأول بدلع لثقتهم الشديدة فى نفسيهم و لأنهم خلاص أخدوا الدرس و ناويين يغيروا الصورة بجد.

**********

طبعاً أتمنى فوز مصر فى قبل النهائى. لكن:-

• ده كان ممكن فقط فى حالة فوز غينيا على كوت ديفوار.. و ده صعب جداً و كوت ديفوار ها تنتقم من مصر فى قبل النهائى.
• نيجيريا ها تلاقى الكاميرون فى قبل النهائى.. و طبعا ها يفوز الأسود.
• و يتقابل الكاميرون مع كوت ديفوار فى النهائى و تفوز الكاميرون.
• و مصر تفوز على نيجيريا و تاخد الثالث..
• لكن من ناحية تانية أتمنى الا تفوز غانا على نيجريا.. عشان مصر تاخد الثالث حسب التوقع السابق.. و قبل كده
• أتمنى ان تفوز غينيا على كوتديفوار عشان مصر تصل النهائى و تغلب الكاميرون مرة تانية زى ما عملت فى 2006 و غلبت الكوتديفوار مرتين ببركات الشيخ حسن .. و ده لو حصل إن كوت ديفوار إتغلبت من غينيا نقدر نقول مبروك لمصر الكأس قولوا يا رب.. شيدى حيلك يا بلد

إحتكار الحديد.. و تلاعب الأهرام .. الجريدة التى كانت عريقة

فى مسألة إحتكار حديد التسليح

http://www.ahramCurFN=fron2.htm&DID=9455.org.eg/Index.asp?


فى خبر سابق متهيألى كان فى كل الجرايد القومية؛ تم الإعلان عن تحويل شركات الإسمنت لقانون منع الإحتكار؛ و تم الإدعاء إنه جارى دراسة موقف إحتكار حديد التسليح؛ و إنه لم يتم الإنتهاء من تلك الدراسة و إنه كمان منتظر الإنتهاء من هذه الدراسة قبل نهاية العام المنصرم 2007؛ لفت نظرى عند إعلان الخبر الأول بأنه تجرى دراسة مدى إحتكار سوق حديد التسليح؛ إنتشرت إعلانات الأخ المحتكر ( أحمد عز )على جميع القنوات الأرضية و الفضائية تعلن عن أن الإحتكار شئ عادى فى كل الدنيا ( زى كل النغمات المنتشرة مثل .. الفساد موجود فى كل الدنيا مش عندنا بس.. الإرهاب قضية دولية.. إلخ و كأنه تبرير للفساد و الإرهاب و أخيرا للإحتكار) و أخذ الإعلان فى الإلحاح بأن الإحتكار شئ عادى و الدليل كما يحاول ان يوحى لنا الإعلان هو إحتكار شركة مش عارف أيه فى إيطاليا؛ و مش عارف شركة أيه فى السعودية.. و مش عارف شركة أيه فى تركيا؛ و الهند و باكستان.. إلخ؛ و فى محاولة مع سبق الإصرار و الترصد لخداعنا و إيهامنا بان يا دوب نسبة إحتكار شركة فى الشرق الأوسط ( لاحظ الشرق الأوسط كله و ليس مصر فقط ) حوالى مش عارف كام المهم إنها نسبة عادية وسط الأمثلة اللى بيديها لنا الإعلان؛لكن لما جه عند شركته عز الدخيلة لم يذكر نسبة إحتكارها فى مصر لأنها تفوق كل ما حاول أن يبرهن به ( متهيألى إن إحتكاره فى مصر يصل إلى 95% ).

********************
و النهاردة طلعت الأخت الدكتورة مني ياسين رئيسة الجهاز ( جهاز حماية المنافسة ومنع الاحتكار‏ ) في حوار مع الأهرام‏ بأنه لا يوجد إحتكار للحديد لتبرئة المحتكر الرئيسى كما هو متوقع؛ المهم لما جيت اعمل البوست ده و أعلق على الموضوع؛ كنت الصبح سيفت الخبر من موقع الأهرام على النت عشان الأمانة بذكر المرجع؛ و لما جيت دلوقتى بالليل أراجع الموقع لقيتهم غيروا الكلام و كتبوا حاجة تانية و تقدروا تراجعوا الصور الأربعة التالية لنفس الصفحة صباحا و مساءا بالجريدة الغراء الأهرام .. التى كانت فى يوما ما مصدر تثقيفنا.. و نشكر الله.. و ندعو للسيد المهندس / أحمد عز بمزيد من الإنتصار و مزيد من الإحتكار إنشاء الله حتى يحتكر نواب البرلمان و يقعدهم فى البيت كلهم قصدى كلهن.. و لا حول و لا قوة إلا بالله.

*********************

إحتكار الحديد طبعة الأهرام الأولى صباحا من الهارد ديسك بتاعى

إحتكار الحديد طبعة الأهرام الأولى صباحا من الهارد ديسك بتاعى 1

*****************

إحتكار الحديد طبعة الأهرام اللى مش عارف رقم كام ليلا من موقع الأهرام اللينك بتاعه فوق

إحتكار الحديد طبعة الأهرام اللى مش عارف رقم كام ليلا من موقع الأهرام اللينك بتاعه فوق 2