9.28.2007

إنفد بجلدك يا مستر كرول

لعيبة الزمالك خلاص كملوا طريق الضياع؛ بعد ما أوهموا الناس و ملأوا الدنيا ضجيجاً بأن هذا الموسم سيختلف و انهم راجعين تانى؛ وأنهم سيحصلون على الدورى و... إلخ
لكن الحقيقة هم ما لهموش فى الكورة غير الشهرة و الهبر و معاهم إدارة زى كل إدارات الزمالك؛ و أيه السبب يعنى اللى يخلى الإدارة دى تختلف هم مش من نفس ناس الزمالك و الطينة من العجينة يفرق ايه زيد عن عبيد فى الزمالك؛ الكل غاوى تلميع و شهرة و هبر و بس
و عشان كدة بأقول للمستر كرول؛ إللى باين عليه راجل محترم ؛ إنفد بجلدك و إلحق قبل ما يتنمردوا عليك؛ و أهه الدليل اللى بيحصل من لعيبة النادى اللى ميعرفوش غير الخناق و الضرب فى بعض بدل ما يضربوا الكورة و بيجروا وراء الإعلام بدل ما يجروا و را الكورة؛ و آخرتها بعد ما حاولت تجامل اللعيب اللى بيدعى أنه كبير اللى إسمه حازم إمام؛ ملأ الدنيا صراخ و جرى وراء الهتيفة بتوعه و بتوع أبوه فى الجرايد .. ليه وليه كرول ملعبوش الماتش بتاع طلائع الجيش؛ وقال يعنى كان ها يجيب الديب من ديله؛ و خناقات اللعيبة فى الملعب على مين يشوط؛ و كل واحد فيهم عامل فيها نجم و ما بيلعبش الا مع نفسه و راجعوا الماتش و شوفوا جمال و عمرو و الأخ طارق السيد؛ كل واحد يمسك الكورة و هات يا جرى و متهيأله هايجرى الملعب كله و يرقص و محدش ها يوقفه و يجيب الجون بعد ما يدخل المرمى بالكورة و عايش فى دور إن الصحافة ها تمدح فى جونه اللى جابه بمجهود فردى و إن لولاه لضاع الزمالك؛ و النتيجة إن الزمالك ضاع بجد و مفيش حد فيهم عمل أى حاجة؛ ومن الأدلة تدخل الإدارة و كتر كلامها فى الجرايد و الفضائيات للشهرة بدون فعل حقيقى ينفع النادى
عشان كدة بأقولك يا مستر كرول إنفد بجلدك؛ و إحترم نفسك زى الراجل العقر اللى فهم خلال ستة شهور إن ده نادى و دى لعيبة حرام إنه يضحى بتاريخه معاهم؛ و فضل إنه يتقال عليه إنه إن غدر بيهم على غنه يضحى بتاريخه مع هكذا نادى و هكذا لعيبة؛ و أعتقد إنهم بيقول عليها إنه غدر بيهم فى جرايدنا بس؛ و الحقيقة إنهم عاجزين عن مطالبته بشئ لأن كان واضح وصريح معاهم لكنهم هما اللى بيضحكوا علينا و الله اعلم إذا كان الإعلام بيضحك علينا معاهم و لا بينضحك عليه منهم زيينا
**************
حاشية : أعتقد إن المستر كرول.. متخصص فى البدنى؛ لكن الراجل طموح أو عنده عقدة نفسه موت يبقى مدير فنى و يأخد اللقب و مش لاقى غير مصر تجيبه مديرفنى سواء الزمالك او المنتخب؛ و الدليل إن كل حاجة شفناهفيها مع أى فرق أوربية أو حتى أفريقية كان مدرب عام مع مدير فنى آخر

هناك تعليقان (2):

غير معرف يقول...

معاك حق يا أخى
ممكن تراجع شكوى المدرب من مجلس الإدارة و من رئيس المجلس المدعو ممدوح عباس حسب ( المصرى اليوم )
http://www.almasry-alyoum.com/article.aspx?ArticleID=77686
و أعتقد إن فعلا هنرى ميشيل سابلهم الجمل بما حمل بعد ما فرضوا عليه عواجيز الفرح اللى كان عايز يخلص منهم؛ بس كرول يستاهل إنه إتنازل لهم على هم عاوزينه؛ يظهر بس العقدة اللى عنده اللى إكتشفتها إنت
و سلام

Mohamed يقول...

السلام عليكم
زوروا العدد الثاني من مجلتاكم و قولولنا رأيكم
Trateesh kalam