12.15.2007

الزمالك.. وجع دماغ تانى


الواحد بجد مفروس من الناس اللى تجيب الضغط فى نادى زى نادى الزمالك.. الوضوع مش مشكلة لعيبة و بس المشكلة فى كل ناس النادى.. كل واحد فيهم عامل نفسه رمز من الرموز.. و بصراحة حكاية الرموز دى فقعانى قوى .. و خصوصا إنها تخلى لعيب خلاص سلم النمر و يفرضه عشان إنه من عيلة الرموز و يحجز مكان و يهبر فلوس و مرتبات و مكافآت و بس .. و كله من دم النادى.. المصيبة بقى حكامه سواء جم بالإنتخاب أو التعيين و الدليل ما نشر اليوم فى الأهرام على لسان عضو مجلس الإدارة اللوزعى اللى معتبر إن غرامة النادى مكسب علشان الألعاب اللى بيعملوها بدون مسئولية مهما كانت تخالف الضمير او ...

*********
و أصل الحكاية إن النادى ضحك عليه لعيب مذكور فى الخبر و سابه و هرب و راح اليونان دون ان يستفيد النادى بأى حاجة.. و بعدين النادى إشتكى للفيفا و لأنه ناشئ حكم الفيفا ساعتها بحق الرعاية و ليس بأحقية النادى فى اللاعب و بالتالى ليس له الحق فى طلب سعره فقط مبلغ كدة نتيجة إن النادى هو اللى رباه و هو صغير.. و المفروض فى هذه الحالة ما دام اللاعب و هو لسة شبل باعنى بلا مبادئ المفروض ما اجريش وراه تانى.. و لكن لأن كل رموز النادى ( و حط تحت الرموز دى ملايين الخطوط ) يهمهم الشهرة فقط .. جريوا وراء اللاعب و حرضوه بدون مبادئ ضد ناديه و نصبوا على النادى اليونانى بحجة الجيش و إنه مش ها يقدر يسافر عشان التجنيد.. طبعا النادى اليونانى ما سكتش ومش ها يسيب حقه عند لاعب ألعبان و ما بيحترمش تعاقداته.. و إشتكاه النادى اليونانى فى الفيفيا و المنتظر أو يجوز يكون الفيفا فعلا حكم على الزمالك بغرامة حوالى 8 مليون جنيه لتحريضه للاعب ضد ناديه.. أى أن الزمالك فى هذه الحالة يتحمل الغرامة دا غير إللى دفعه للاعب .. يعنى يقف اللاعب اللى ما فيش منه بمبلغ طائل و غرامة كبيرة .. الغريب إنه لن يفيد النادى ( و هذه نبوءة و إبقى إفتكروا ) .. اللى غاظنى بقى بجد هو تعليق عضو مجلس الإدارة ( من رموز النادى ).. إللى لو فكر فى معنى كلامه شوية.. و بعد ما الزمالك يفترض؛ و نفترض نحن معه؛ إن جزء من الغرامة هو حق الرعاية اللى أخده الزمالك قبل كدة من النادى اليونانى .. ها يطلع إن اللاعب واقعيا نصب على الزمالك و إن الزمالك دفع دمه قلبه فى لاعب هو اللى رباه.. و إنه دفع لنادى آخر أجنبى نتيجة عدم ضمير اللاعب و من حرضه على ترك ناديه من مسئولى( قصدى رموز ) الزمالك.. و إن الزمالك دفع غرامة للنادى اليونانى.. و هذا يعتبر مكسب للنادى اليونانى و خسارة للزمالك.. و مع ذلك يطلع المسئول .. قصدى الرمز الحالى و يقول إن ده مكسب للزمالك.. يعنى بالبلدى كدة تبقى الحاجة بتاعتى و أدفع فيها حوالى أربعة مليون جنيه لنادى أجنبى ( فى حالة إحتساب فرق الغرامة من حق الرعاية حسب وجهة نطر الرمز ).. عشان يعترف إنها بتاحتى.. يا أخى أحة..
http://www.ahram.org.eg/Index.asp?CurFN=spor2.htm&DID=9431