12.16.2006

مؤامرات اللعيبة الزملكاوية

أنا أهلاوى جداااااااااااااا.. بس الموضوع بصراحة ينرفز
...
...
...
من كام يوم عرفت إن الأخ حلمى طولان رفض تدريب نادى الإسماعيلى؛ و عمل فيها خضرة الشريفة؛ بس لما سمعته حسيت إن الموضوع مش موضوع خضرة ولا حاجة لكن فيه سر بس مش باين للغلابة أمثالى؛ المهم امبارح و انا بتفرج على ماتش الزمالك و المصرى حسيت إن اللعيبة مش طبيعية و مش ممكن لعيب عنده ذرة إحساس بالمسئولية تكون دى حالته؛ و بعدين يا سيدى و انا بتفرج على الأخ اللى يفرس أحمد شوبير؛ هناك فى العزبة بتاعته اللى اسمها دريم؛ كان ايه مستضيف الخضرة الشريفة؛ قصدى حلمى طولان؛ قال ايه عملوا تمثيلية سوا إن كل مجلس الإدارة كله بيدور على الأخ طولان؛ و اللى بلغهم الأخ الصحفى (برضه ) اسمه أسامة مش عارف مين الزملكاوى حتى النخاع؛ و الأخ شوبير و كأنه عمل سبق كبير؛ إختراع يعنى؛ فى برنامجه ( مع إنه مش هو اللى كشف الموضوع) لكن تقول أيه؛ المهم الشوبير الهمام عمل فيها عنتر و إدى أمر للطولان أنه يفتح موبايله مع ان ده مش من مبادؤه لكن أهه أمره لله بقى عشان السبق؛ و الأخ الطولانى إدعى إنه إتفاجآ ( و كان باين الإدعاء قوى و عمل فيها إنه مش عارف يقول أيه مع إنه ها يموت عليها). المهم إتضحلى ساعتها هو ليه ما وافقش على عرض الإسماعيلى بالرغم إنه عاطل؛ خالى شغل يعنى؛ قاعد فى البيت يعنى؛ و إكتملت فى ذهنى و أمام ناظرى ( حلوة ناظرى دى ) أتاريه مظبط نفسه مع مجلس الإدارة و اللعيبة إنهم يتأمروا و يتغلبوا من المصرى التعبان قوى السنادى عشان يطفشوا المدرب الأهبل اللى مش عارف هو إزاى كان متقبل يشتغل فى الجو المقرف فى نادى المؤامرات ده و على فكرة دى مش أول مرة اللعيبة تتأمر بس المفاجأة إنه المرادى مش الخبيث فاروق جعفر دا المرادى الأخ الطولانى؛ و دمتم و دام نادى الزمالك خرابة كدة

هناك 7 تعليقات:

المصري أفندي يقول...

يعنس لما عشرة ولا خمستاشر مليون جنية يتصرفوا على شوية عيال بيلعبوا كورة بالناس و مشاعرهم مش بس بالكورة و يبقى فيه مسئولين قال ايه تربويين و افاضل و اشراف و كفاءات و ما يعملوش حاجة يبقى كان لازم يتقفل النادي بالضبة و المفتاح ... ولما يكون ملايين النادي مش من جيب اللي خلفوا أبوا اللاعيبة ولا مجلس الإدارة ولا الأجهزة الفنية يبقى لازم كل واحد صرف مليم أحمر لهدف معين و لم يتحقق لازم يتسأل لماذا صرف ؟و كيف صرف ؟ و لماذا لم يتحقق الهدف ؟ و كيف سيرد الفلوس من جيب أهله؟ ولا هو المال السايب يعلم السرقة و اللي معاه قرش محيره يشتري شيكابالا و عمر زكي و يتعاقد مع فينجادا و يخسر من فريق درجة عاشرة من بلد ما عادش فيها كورة ( مركز شباب ابو عريرج )يا مصيبتنا

المصري أفندي يقول...

والله العظيم حرام الفلوس اللي بتنصرف على الفريق ده وحرام كمان دول يلعبوا باسم الزمالك و لو كان مارادونا مع اللاعيبة دي برضو كنت قلت مايستاهلش يلعب للزمالك ....علشان النادي و الفريق مش ملك محمد الفايد ولا ابراموفيتش ...لا دا ملك شعب مش لاقي ياكل و بلد مديونة للركب و كمان الفلوس دي مش بتكسب ....دول عايشين على التبرعات و الدعم الحكومي... و لو استخدمناها لتشغيل العواطلية اللي في الشارع و أجرنا ارض النادي اللي هي ارض الاوقاف كانت جابت ملايين و بالمرة نبيع اللعيبة دي لدول الخليج اللي معاهم فلوس يبعزقوها على لاعيبة ما عندهاش ضمير ولا احساس بس نقول ايه ؟ ماهو المال السايب يعلم السرقة و ربنا ينتقم من اللي حكم العيال المايصه في رزق و قوت الغلابه

Egyptos يقول...

عزيزى المصرى أفندى
هون عليك؛ فهولاء مثل كل شى فى البلد إختفى منها الضمير و كل يهمه فقط ما يلهفه من المصارى( على رأى إخوتنا الشوام)؛ فلا تجد احدا يمارس عمله بضمير أو بإتقان؛ حتى فى شغلنا فى القطاع الخاص مش العام كمان كله همه ياخد كام مش همه إنه يؤدى عمله بجدية و إتقان و ضمير؛ فاللى حاصل هو أزمة مجتمع و متجسدة بشكل واضح فى هذا النادى و هؤلاء البشر الذين يديرونه او يلعبون به

SomeOne يقول...

اه
منهم لله
أتفق معك
وهذه أخر كتاباتي عن الأهلي

http://shidwik.blogspot.com/2006/12/blog-post_15.html

Egyptos يقول...

انت ألف مرحب بيك و يشرفنى طبعا حضور كتب كتابك بس لازم أعرف بدرى شوية عشان ارتب اجازتى لأنى بأشتغل فى محافظة نائية

غير معرف يقول...

كمان طلعت اهلاوى ومش اخوانى انتا اصضبحت عدوى اللدود ايه المتشبث بالحكومة النافرة سوف نجهز الجياد ونحمى السيوف وسنبدأ المعركة ههههههههههههههه

مالك يا عم داخل عندى سخن كده مفروض من اداب العظماء اللى زيك وزى كل اهلاوى رغم انى زملكاوى يعنى هههههههه تتكلم بأسلوب لا يثير اللى امامك بضيق من اسلوبك فى الحوار معه


انا مش اخوانى ولا حاجة بس اى حاجة مش بتعجبنى فى البلد بكلم وبقول عليها ومدونتى معروفة بكده اما لما حضرتك كاتب فى الهايد ادررس بتاعك بكره انفلونزا الطيور والاخوان المسلمين حرية شخص مقولناش حاجة لما بقى تيجى عندى وتقولى اتحداك انك تنشر تعليقى فعيب عليك جدا انك تيجى عند كازانوفا وتقول كلام زى ده لأنى اول مبادىء مدونتى الحرية فى الرأى حتى لو كان فى مهاجمتى انا شخصيا


وبالتوفيق لمدونتك يا مان

زملكاوى مخنوق من فرقته

كازانوفا

Egyptos يقول...

بأعتذر بجد و بأعتذر بحرارة
ده أولاً؛ أما ثانياً : فأنا ما أنكرش إنى حسيت إنك إخوانى
و انا مش بأكره الإخوان كأشخاص ( بدليل إنى كنت بتعامل مع زمايلى من الجماعات فى الكلية عادى جدا و كنت اتبادل ورق الكورسات معاهم؛ لكن الحقيقة اللى بكرهه فيهم وفى كل الناس هو الكدب و الخداع و إطلاق الشائعات وخلاص؛ و الموضوع ده باين جدا فيه إستعراض القوة حتى لو كان غلطة و إعتذروا عنها ( وانا لا أنكر إعتذارهم) بس فى الإعتذار فليكن إعتذار مجرد ما فيش داعى للكذب لتبرير الغلطة زى ما بيقولوا ( وانا سمعت ريس الإتحاد الموازى فى دريم بيقول إن ده مكانش فى الجامعة دا كان فى المدينة لكن المذيعة كانت ناصحة وقالتله هو مكتب وكيل الكلية برضه فى المدينة يعنى رغم الصور واضحة فإنه بيكدب و كمان لما المرشد العام يقول طظ فى البلد طيب ازاى أثق فيه و اقبل انه يحكمنا؛
حاجة أخيرة بقى انا معنديش مانع يبقى عندهم حزب سياسى ( وهو دا الواقع فعلا رغم لعب الحكومة و عدم إعطاهم التصاريح) بس يكونوا صرحاء مع نفسهم و معانا و يعترفوا ان كل همهم هو الحكم و مفيش داعى يقولوا انهم لا يبتغون سوى وجه الله و يخدعونا
و أخيراً أكرر إعتذارى لأن حسيت إنك بتدافع عنهم؛ بس بالرغم إن بأحترم حريتك إنك تؤمن او تحب أو تكره أى حد و أى جماعة لكن مش معنى إنى مش مؤيد للحكومة أكون مؤيد للإخوان أو العكس؛ انا كمواطن عادى بيرشدنى عقلى و إحساسى برضه يهمنى فى موضوع فايدة بلدى اللى بحبها بجد مش شعارات؛ و كمان مصلحتى الشخصية كفر و حريتى ها تكون مع مين لما يمسك البلد